[Tèxtes]

[Debuta]

[Seguida]

WINDOWS 95

Sonque un vestit navèth sus un sistèma vielh ?

Windows 95 qu'ei un sistèma d'espleita navèth. Que's vòu lo successor, suus ordiaders dab processors Intel (o compatibles), deu parelh DOS-Windows 3. Que hè servir un metòde d'adressatge de 32 bits. Que vòu guardar la compatibilitat taus programas escrivuts capvath DOS e Windows 3. Que presenta un escabòt d'atrunas navèras. Mes aquera nautat ne seré pas ua illusion ?

Tres objècts suu burèu...


Windows 95 qu'ei navèth subertot tà çò qui ei de l'entrefàcia. Los engenhaires de Microsoft qu'angon copiar sus las entrefàcias d'Apple (System 7 adara aperat MacOS) e d'IBM (OS/2 Warp) e que horniscon daubuas autes nautats. Atau qu'apareish un  burèu  - lo hons de l'ecran - e tanben ua barra d'aviada qui's pòt escóner. Las hièstras que's càmbian los botons aus còrns. Los dus botons triangulars de Windows 3 que dèishan la plaça a tres botons, e lo de dreta que permet de barrar la hièstra d'un clic unic. Taus usancèrs de Windows 3, aqueth tresau boton que demandarà un momentòt d'acostumança... Ua aute navèra causa qu'ei l'usança deu boton de dreta de la murga. Com capvath OS/2 Warp, que permet d'amuishar un menut especiau. Com lo boton unic deu Macintosh, que hè eslurrar ua icòna cap a ua aute destinacion : un dorsèr, un programa, ua imprimenta o lo terrèr.

Installacion mei aisida

Avants l'utilisacion, l'installada qu'ei tanben navèra. Dab la generalisacion de disquetas d'ua capacitat especiau (1,7 Mo). Dab un programa d'installada qui ac hè tot, o quasi tot : que sap conéisher e configurar los periferics mei espandits (clavèr, murga, cedé, carta de hialat). Tot que's pòt installar automaticament, e tanben lo hialat Microsoft (ont tots los ordiaders e son parius - com en Windows tà Workgroups).

Compatibilitat e nautats

Tot dia, l'usancèr que pòt har servir las atrunas vielhas de Windows 3.1 : lo gavidaire de programas e lo gavidaire de fiquèrs, per exemple. Més que's poderà acostumar a clicar sus ua icòna de document entà obrir dab lo logicial qui cau. Com las atrunas vielhas, que troberà autes programas vielhs dab lo vestit nau deus botons navèths. E que i aurà, solide, aplicacions navèras que... Microsòft a preparadas (Office 95).

Aute nautat qu'ei ua nautat "forçada" més tanben a la faiçon de Microsoft. Los usancèrs d'OS/2 Warp que's pòden abonar e conectar a Internet que tots los utís e son dats dab lo sistèma. En Windows 95, Microsoft que da l'accès au son hialat, MSN (Microsoft Network). Que vòu tanben apoderà's d'aqueth mercat. S'i escadosse de plan, seré la fin d'Internet...

Dobtes tecnics

Las criticas en la premsa informatica que viénen sustot deus especialistas de sistèma. Entà assegurar la compatibilitat dab las vielhas aplicacions, Microsoft guardè en Windows 95 hèra de parts deu sistèma en adressatge de 16 bits. Ua part deu sistèma medish n'ei pas en 32 bits. E l'espaci de memòria utilisat entà l'adressatge de 16 bits ne protegeish pas lo sistèma deu maufoncionar deus autes programas. En brac, Windows 95 n'ei pas tant navèth en la soa estructura pregona, e presenta riscas d'estancas mauescadudas e manca de seguretat... Mes dab tota la reclama a l'entorn, se venerà totun...

[Debuta] [Seguida]