TOTES CONTRA MICROSOFT

Windows 95 : se daissaràn pas tòrcer...

I a qualques annadas, IBM e Microsoft trabalhàvan cotria per desvolopar çò que disián èsser lo sistèma d'esplecha de deman, OS/2, successor del DOS qu'avián ja produch ensems. Mas aquel amor durèt pas e dempuèi los dos fan sos sistèmas a despart. En mai d'aquò IBM s'aliguèt amb Apple per produir un novèl microprocessor, lo PowerPC. La guèrra a doncas tres actors màgers...

La concurréncia espera Windows 95. A d'armas de las bonas, notadament un gaubi en produccion de sistèmas

d'esplecha. N'es aital per Apple, que l'entre-fàcia del System es un modèle que totes desgàunhan. Mas Apple demorat tròp pichon dins lo mercat del material es a cambiar sa politica. Primièr en s'aligar amb IBM. Lo produch de la recèrca comuna, la nièra PowerPC es dins los Macintosh dempuèi 1994. E pel sistèma, l'abandon dels processors Motorola 68000 se faguèt sens pena. Lo sistèma sap executar de programas escrichs pels processors vièlhs, e quitament far virar Windows 3 dins una imitacion logiciala. Ara, Apple permet a de fabricaires de sortir de materials compatibles. Son ja sortits en America, mens cars que los Apple e pel meteis avantatge : un sistèma d'esplecha que demòra lo de melhor apréner. Mas se cal pas dormir. Lo sistèma del Macintosh se deu melhorar per subreviure. Alara, Apple alestís Copland, que deuriá sortir l'an que ven. Un sistèma que permet l'execucion simultanèa de mantuns programas. Que protegís plan la memòria. E après, anóncia ja Gershwin, per dos o tres annadas après.

IBM e sos PowerPC

IBM tanben lucha a dos nivèls. A la davalada de 1994, OS/2 Warp ambe sa barra d'aviada,

son burèu e l'usatge dels dos botons, e sa session Windows 3.1, prefigurava ja Windows 95. Mas aviá ja una isolacion complèta de las aplicacions de 16 bits del sistèma. E IBM contunha de se melhorar. Ven de sortir (al mes de julhet) Warp Connect qu'es una mena de "practica" universala que permet a un ordinator de se connectar a totas menas de serveires, locals o alonhats. Lo problèma es dins lo material. Ven sonque de sortir sos primièrs ordinators amb PowerPC, e la version de Warp per aquel processor es pas acabada... Sortís ambe una version d'Unix... e ambe Windows NT. Cal esperar la fin de l'annada per véser se OS/2 Warp marcha vertadièrament, e es per contunhar. Prudent, IBM a anonciat que i aurà dins l'avenidor de PC que farián servir MacOS...

NT, fin finala

Es que Windows NT es mai segur e mai avenidor que Windows 95. Windows 95 sap sonque foncionar sus una mena de processor. Windows NT, qu'èra avants lo divòrci OS/2 version 3, sap passar d'un material a l'autre. La tòca de Microsoft pareis clara a la màger part dels analistas del mercat : impausar Windows NT pertot. Una version avenidoira de Windows NT, escaissada Cairo, lo deuriá véser préner lo vestit de Windows 95. Lo passatge de l'un a l'autra serà pas pus qu'una question de poissença materiala. MacOS 7.1 e Windows 3.1 víran ambe 4 Mo de memòria. OS/2, Windows 95 e MacOS ambe 8. Per Windows NT, ne cal al mens 16...

JOAN-FRANCÉS BLANC

[Avants] [Seguida]